Hiri mugikortasunaren inguruko joerek etengabeko bilakaerak eta aldaketak jasaten dituzte eta geroz eta ibilgailu elektriko gehiago dago merkatuan, prestazio oso ezberdinekin. Guzti horrek gure motordun ibilgailuak alde batera uztera bultzatzen gaitu, bereziki hirian zehar egin beharreko ibilbide laburretan mugitzeko.

Zenbait aukera ibilgailu elektrikoen artean.

• Patinete elektrikoa.
  Mugikortasun azkar eta erosoa eskaintzen duen eta litio bateria bat duen patinetea. Gainera, ibilgailu arina eta praktikoa da eta erabilera erraza eskaintzen du.
• Skateboard elektrikoa.
  Hasiera batean umeentzako ibilgailu moduan merkataratu zen arren, denborarekin heldu askoren desplazamenduak egiteko tresna bihurtu da. Bere erabilera patinete elektrikoarena baino zailagoa da baina prestazioak nahiko antzekoak dira azkartasuna eta erosotasunari dagokienez.
• Segway-a.
  Patinetea eta sktaeboard-aren arteko hibrido bat da. Ez da bi hauek bezain praktikoa handiagoa delako eta bere garraioa zailagoa suertatzen delako.
• Bizikleta elektrikoa.
  Bizikleta arruntaren bertsio motorduna. Bi mota daude, alde batetik lagunduriko bizikletak daude, pedalei eragiteko laguntza eskaintzen dutenak. Bestetik, bizikleta elektrikoak daude, hauetan ez da beharrezkoa pedalei eragitea aurrera egiteko motor elektriko batean bezala baina gidatzeko baimenaren beharrik gabe.

“Ibilgailu elektrikoen bateriak ingurumenerako kaltegarriak dira”.

Aukera guzti hauek bateria bat daukate. Zer esan nahi du honek? Egia da hirian zehar mugitzerakoan ez dugula CO2-rik isuriko, baina momenturen batean ingurumen eragin garrantzitsuak dituen gai batekin topatuko gara: agortutako bateriak.

Oraindik goiz da honen inguruko ondoriorik ateratzeko, izan ere, ibilgailu hauek oso berriak dira eta haien baterien bizitza ez da agortu oraindik. Baina merkatuan denbora gehiago daramaten auto edo motor elektrikoen bateriekin sortutako arazoei erreparatuz gero hainbat ondorio atera ditzakegu. Nahiz eta bateria agortuen birziklapena sustatzeko lana martxan den, frogatuta dago baterien birziklapen prozesua nahiko konpexua dela.

Ibilgailu elektrikoen baterien birziklapenaren egoera Europar Batasunean.

Europar Batasunean merkaturatzen diren litio bateria guztietatik, %5 birziklatzen da soilik. Honen arrazoiak, litioaren prezio aldakorra eta birziklapen prozesuaren kostua handia dira, beste askoren artean. Bateria askok hondakindegi edo erraustegietan amaitzen dute, praktika hauek ingurumenaren gain inpatuak eragiten dituzte. Gainera, Europar Batasunak oraindik ez du ibilgailu elektrikoen bateriak birziklatzeko estandar teknikorik garatu eta ekoizle bakoitzak bere fabrikazio teknologia propioa erabiltzen du, birziklapen prozesua are gehiago zailduz.