Ihobek (Eusko Jaurlaritzaren Ingurumena Kudeatzeko Sozietate Publikoa) garatutako Erronka Garbia metodologia, 6 jarduera-ardatzetan (instalazioak, erosketak, hondakinak, energia, ura eta mugikortasuna) ekitaldien ospakizunekin lotutako eragin kaltegarriak minimizatzea ahalbidetzen duen prozedura bat da. Metodologia hau aplikatzean, erakunde antolatzaileek Erronka Garbia-Ekitaldi Jasangarria ziurtagiria lortzen dute eta horren helburua ekitaldi jendetsuen garapenari lotutako inpaktu kaltegarriak arintzeko beharraz kontzientziatzea da. Asko dira jada ziurtagiri hori lortu duten ekitaldiak eta aurten Bilboko Aste Nagusiak bat egin du zerrenda horrekin.

 

Udalak proposatutako jokaera-neurri zehatzak

Ziurtagiri hau lortzeko, udalak jokaera neurri zehatz hauek proposatu zituen:

• Birziklatze-guneak hobeto ikus daitezen, hauek banderatxoen bidez adieraztea.
• Zubietako dekorazio-argi guztiak Led erakoak izatea, kontsumo txikikoak alegia.
• Itsasadarrera hondakinik jausi ez dadin, baranden inguruan sare bat jartzea.
• Garbiketa-zerbitzuek tresneria elektrikoa leheneztea.

 

Herritarrak inplikatzen dituzten gomendioak

Proposatutako jarduketa-neurriez gain, Bilboko Udalak honako gomendio hauek betez parte hartzera gonbidatzen ditu herritarrak:

• Garraio publikoa erabiltzea.
• Hondakin bakoitza dagokion edukiontzian sartzea.
• Hobe ur botilatua ez hartzea eta horren ordez iturriak erabiltzea.
• Ekitaldi gatronomikoetan parte hartuz gero, erabilera bakarreko osagai plastikorik ez erabiltzen ahalegintzea.
• Zigarrokinak lurrera bota beharrean, hautsontziak erabiltzea.